Contre richesse superflue
Superfluité
Doit estre tranchée ;
Richesse cachée
Produict pauvreté.
Du Singe et du renard
Le Singe, ingénieuse beste,
Feit au Regnard une requeste
De luy donner par amytié
De sa queue une grand moytié,
Pour servir à couvrir ses fesses.
Le Regnard, tout plein de finesses,
De ce faire fut refusant,
Et s’excusa en luy disant
Que sa queue ne luy nuysoit
Comme le Singe luy disoit,
Et, combien qu’elle feust crotée,
Ne serait point par luy ostée.
Plusieurs sont au Regnard semblables
Qui ne sont pas plus amyables,
Et ce qu’ilz ont plus d’abundant,
Le refusent au demandant,
Par ung desir d’amour extrême
Qui ne veult du bien qu’à soymesme
En laissant perir et gaster
Ce qu’à aultruy peult proufiter.
“Du Singe et du Regnard”
- Gilles Corrozet (1510 – 1568)