De la Fame qui feseit duel de sun Mari
alias De l’Oume mort e de sa moilier
D un Hume cunte li Escriz
Qui esteit mora et enfoïz ;
Sa Fame en meneit grant dolur
Deseur sa tumbe nuit è jur.
Près d’iluec aveit un Lairun
Qi ert penduz par mesprisun ;
Par la cuntrée fud criéi,
Qui le Larron aureit ostéi ,
Sun juigemens mesmes aureit ;
S’atains esteit, pendus sereit .
Uns Chevaliers le despendi
Ses parens ert , si l’enfoï.
Lors ne sot-il cunseil truver
Cume il s’en puisse délivrer ,
Car séu fu de meinte gent
Qu’il le teneit pur sun parent.
Au cémietière va tut dreit
Où la Preudefame s’esteit ,
Qui sun Segnur ot tant plorei ;
Cointement dune li a parleï ,
Dist li qu ele se cunfortast,
Mult sereit liez s’ele l’amast .
La Prodefame l’esgarda
Grant joie en fist, si l’otria
K’ele fera sa vulenté ;
Li Chevaliers li a cunté
Que mult li ert mesavenu
Dou Lairon k’ il ot despendu ;
Se ne li seit cunseill doner
Fors dou païs l’estuet aler .
La Prodefeme respundi
Deffoons mun Barun deci,
Puis sel’ penduns là où cil fu
Si n’iert jamès aparcéu ;
Délivrer deit-hum par le Mort
Le Vif dunt l’en atent confort.
moralité:
Par iceste signifiance
Poons entendre quel créance
Doivent avoir li Mort ès Vis
Tant est li Mondes faus è vis.
“De la Fame qui feseit duel de sun Mari”