Un ome si cresié lou pu bèu de la terro
E n’en troubavo ges de tant poulit coumo éu;
De-bado lei mirau li diguèsson ço qu’èro,
Li avié pas fe, lou gargamèu!
Pamens, dins toutei lei carriero,
Au tiatre em’ ei cafè, meme dins cade oustau,
Vo lei vitro, vo lei mirau
Li disien que sa croio èro pas vertadiero;
Mai viravo l’aigo à sa fouent
E lei mirau èron pas bouen.
Coumo faire, moun bèu Narcisso,
Quand la verita li es? Anè dins lei campas,
Luen de la vilo: Aqui, si diguè lou plan-pisso,
Troubarai plus rèn sus mei pas.
Va cresè coumo acò que poudié pas mies èstre.
En s’espassant dins lou campèstre,
Un jour, lou soulèu èro caud,
S’assetè sus lei bord d’un riau:
L’aigo, tout en courrènt, retraisié sa figuro.
De vèire la caricaturo
Noueste ome petejè coumo un gros serpentèu,
Mai brulè sa poudro au soulèu.
L’aigo èro lindo, puro e claro,
E li remandavo sa caro.
Cerquè de treboula, ‘m’ uno bleto, lou foun;
Coumo èro courredisso, au mai la gassaiavo
Au mai se li vesié. Lou paure! s’espurgavo
A fouita l’aigo em’ un bastoun,
E s’en-anè qu’avié lou goun.
Counèissi abord de gènt qu’es d’ase de naturo
E si creson d’avé d’esperit, de talènt
Coumo noueste paure ignourènt
Cresié d’avé bello figuro
Se liejon dedins lei journau,
Qu’es lei mirau de la sapienço,
Sei qualita, va bèn; mai quand es sei defaut,
Se vesias coumo acò lei fienço. . .
Pouscon, fan d’estrambord, lei journalisto es d’ai!
An ges de jujamen, o dou mens, an pas mai
D’esperit, de sabé, que de couet lei granouio!…
Leissas-lei parla, lei bardouio;
Es élei qu’an ges de resoun
Mai va vesès pas, grand viedase,
Qu’es vous-autre que fès leis ase
En fouitant l’aigo em’ un bastoun!
(L’Ome e soun imàgi)
- Joseph-Marius Diouloufet, 1785 – 1840
