Croire bon conseil !
Plusieurs en leur faict n’ont advis,
Et ne veullent ouyr ne croire
D’aultruy le conseil et devis
Par faulte de sens et mémoire.
De L’Arondelle et aultres Oyseaulz
Ung laboureur son lin semoit,
Parquoy l’Arondelle blasmoit
Les oyseaulx qui en leur présence
Souffroient semer telle semence,
Leur disant : « La graine mangeons
Et du laboureur nous vengeons ;
Car vous devez tous bien cognoistre
Que, quand ce lin viendra à croistre,
Il en fera laqs et fillez
Dont serons prins et exillez. »
Les aultres oyseaulx s’en moquerent,
Sote prophete l’appelerent.
Quand l’Arondelle veid croissant
Ce lin fleury et verdissant,
A ces oyseaulx dict de rechef :
« Il vous viendra quelque meschef,
Prins serez et souffrirez pis
Sy vous n’arrachez ces espicz. »
Les aultres se mocquerent d’elle.
Depuis la petite Arondelle,
Quand vint à l’arriere saison,
Alla loger en la maison
Du laboureur ; après advint
Que, quand ce lin bien meur devint,
On en feit fillez, dont prins furent
Ces aultres oyseaulx, qui moururent
Par faulte de ne croire en rien
Celle qui les conseilloit bien.
“De L’Arondelle et aultres Oyseaulz”
- Gilles Corrozet (1510 – 1568)
