alias De l’Aronde qui voleit les lins mengier
Par viel essample escrit truvuns
Quant lin sema li primiers Huns
Don lin sema pur plus aveir.
L’Arunde fu de grant saveir ,
Bien s aparçut ke par le lin
Serunt Oisel mis à lur fin ;
Dou lin puet-hum la reiz lacier
Dunt-hum les puet tus damagier.
Tuz les Oisiaus fist assanbler,
Si lur vuleit conssel douner
K’il alassent les lins mengier ,
K il ne puissent fructéfier.
Li plusur nel’ volrent fère ,
Au Seméour i vunt retraire
Le cunseil que lur ot duné.
Quant l’Arunde lot escuté,
De ses parens fist assamblée
Od les meillurs de sa lingnée :
Si lor a ceste œvre cuntée
Cum il l’aveient encusée ,
E r’aviliée et desturbée .
Puis s’est au Vilain acordée
K’en sa maisun sufri sun ni ;
Là furent si Oisel nurri,
Et el dona à sun lin pès ,
Jà par nus d’eulz ne perdra mès.
Cil fist dou lin engins plusurs
Dont prist Oissiax grans è menurs ;
Lors n’eussent pas cest mal éu
S’il eussent bun cunseil creu.
Moralité:
Ceste semblaunce est assez veire
Kant Fols ne veut le Saige creire
Ki bien li set cunseil duner ,
E de sun mal le vieut garder;
Se demages l’en deit venir
Lors est trop tart dou repentir.
“De l’Arondelle et des Oiseax”
