Or cunte d’un Chien mentéour
De meintes guises trichéour ,
Qui une Berbis emplèda
Devant Justise l’amena.
Se li ad un Pain démandei
K’il li aveit, ce dist, prestei ;
La Berbiz tut le dénoia
E dit que nus ne li presta.
Li Juges au Kien demanda
Se il de ce nus tesmoins a
Il li respunt k’il en ad deus,
C’est li Escufles è li Leus.
Cist furent avant amenei ,
Par sèrement unt afermei
Ke ce fu voirs que li Chiens dist :
Savez pur-coi chascuns le fist,
Que il en atendoient partie
Se la Berbis perdeit la vie.
Li Jugièrres dunc demanda
A la Berbis k’il apela ,
Pur coi out le Pain renoié
Ke li Chienz li aveit baillié,
Menti aveit pur poi de pris
Or li rendist ainz qu’il fust pis.
La Chative n’en pot dune rendre
Se li convint sa leine vendre ,
Ivers esteit, de froit fu morte,
Li Chiens vient, sa part enporte
È li Escoffles d’autre par;
E puis li Leus, cui trop fu tard
Ke la char entre aus detreite
Car de viande aveient sofreite.
È la Berbiz plus ne vesqui
E ses Sires le tout perdi.
Moralité :
Cest essample vus voil mustrer,
De meins Humes le puis pruver
Ki par mentir è par trichier ,
Funt les Povres suvent plédier.
Faus tesmoignages avant traient ,
De l’avoir as Povres les paient ;
Ne leur chaut que li Las deviengne,
Mais que chascuns sa part en tiengne.
“Dou Chien e d’une Berbis”