Jadis esteit custume et lois,
Ke li Léunz dut estre Rois
Seur tutes les Bestes qui sunt,
E ki cunversent en cest munt,
Dou Bugle ot fait sun Séneschal (1)
Car preu le tint et à loial ;
Au Leuz bailla sa Provosté . .
Tuit trois en sunt el bos alé ,
Un Cerf truvèrent è chacièrent ,
Qant pris l’orent, si l’escurchièrent ;
Le Lox au Bugle demanda
Coment le Cers départira ?
C’est bien, fet-il, à mon Sengnur
Cui nus devuns porter henur.
Li Léons a dit è jurei,
Ke tuit sevent par véritéi
Ke la première part aureit
Pur ce que Reiz è Sires esteit ;
Ke l’autre part pur le gaaing,
Il ot esté li tiers compaing ,
La tierce part ce dit aureit
Car il l’ocist, raisuns esteit ;
E se nus d’eauz deux la preneit
Ses anemis mortex sereit.
Dunc ni osa nus atuchier
Tut lur estut le Cers laissier.
Moralité :
Autresi est n’en dutez mie ;
Se Povres hum prent cumpaignie
A plus Fort humme k’il ne seit,
Jà dou gaaing n’aura espleit;
Li Riches volt aveir l’ounur
U li Povres perdra s’amur.
Se lur gaaig deivent partir
Li Riches velt tut retenir.
– Dans plusieurs manuscrits cette fable et la suivante , sont de suite et sans être séparées.
1) Grand maître de sa maison. La charge de grand-sénéchal fut, dit-on, instituée par Charlemagne , à l’imitation de ce comte du sacré palais des empereurs romains, qu’Honorius appelle comitem Castrensem sacri Palatii. (Dou Lion, dou Bugle et de un Leu)