Jadis avint k’uns Leus erra
Par un kemin, si encuntra
Une Truie qui preins esteit;
Vers li ala à grant espleit
E dist que pès li vient dunner ,
Or se hastast de porceler ;
( Car ses Pourciaus voleit aveir).
Cele respunt par grant saveir,
Sire, cument me hastereie
Tant cum si près de moi vus veie ,
Ne me puis-jeo pas délivrer,
Tel hunte ai de vus regarder.
Ne savez mie qui ce munstre
Tutes femelles unt grant hunte,
S’aucuns Masle les doit tuchier
A tel besung, ne aprismier .
Adunc s’en vait li Lous mucier
Qui les Porciauz vuleit medgier;
E la Truie s’en est alée
Qui par engien s’est délivrée.
Moralité :
Cest essemple deivent tenir
Toutes Fames, è retenir
Por seulement leurs cors garir,
Ne lessent lor enfanz périr.
“Dou Leu et de la Truie prains”