D’un Vilein woil ci recunter
Qui od sa Fame vit a!er
Vers la forest sun Dru od li ,
Après currut, mes cil s’enfui
Si s’est dedenz le bois muciez ;
Si s’en returne tuz iriez ,
Sa Fame laidi et blasma,
E la Dame li demanda
Pur qu’il palloit ensi vers li ,
E sun Barun li respundi
Que il ot véu sun Léchéur
Qi li fis thunte et deshonur,
Aler od li en la forest.
Sire , fait-ele , s’il vus plest,
Pur l’amur Diu dites me voir ,
Cuidastes vus Hume véoir
Aler od mei , nel’ me celez.
Jel’ vi, fait-il, en bois entrez ;
Lasse ! fet-ele , morte sui ,
Demain murrai u encor hui ;
A m’Aiulle avint autresi
Et à ma Mère, car jel’ vi
Un po devant lui finement .
Ce fu séu apertement
K’uns Bachelers les cunduiseit
Mais ne sorent ù cil aleit.
Or, sai-jeo bien , près est ma fins ,
Mandez , Sire, tus mes cuisins ,
Si départiruns nustre aveir,
N’oze ù siècle plus remaneir .
A tute la moie partie
Me metrai en une abbeïe ;
Li Vilains lot, merci li crie ;
Lessiez ester, fet-il, Amie,
Ne partirez de mei ensi,
Mençunge fu quankes jeo vi ;
N’oz , fait-ele , plus demurer
De m’âme m’est net pensser
Enseurke-tut pur la grant hunte
Dunt vus avez fet si grant cunte.
Touz-jurs me sereit repruvé
Que malement aureie uvré ,
Se vuz ne jurez sairement
Si que l’orrunt nustre parent
Que ne véistes Hume od mei ;
Si m’afiez la vostre fei
Qe vus jamès ne me sivrez,
Ne mais nel’ me repruverez ,
Que mavès gré ne m’en sarez
Ne jà n’el me reproicherez.
Volentiers , Dame , cil respunt ;
Au munstier ensamble s’en vunt,
Là , li jura ce que li quist
E plus assez qu’ele ne dist.
Moralité:
Pur ce dist-on en repruvier
Ke Fames sevent engingnier;
Les mençunges funt voirables ,
Si unt un art plus que Diables.
“Dou Vilain qui od sa Fame vit aler son Dru”