Jadis avint q’en un estanc
Entur les rives et ou fanc,
Ot de Raines grant cumpaignies
Qui de lunc-tens i sunt nurries.
Là desdengnèrent arester ,
A la terre voiront aler.
A la Destinée crièrent
Suventes feiz li demendèrent,
Que Roi lur déust envéier
Qe d’autre cose n’unt mestier .
Qant maintes foiz orent proie,
La Destinée a envéié Enmi
cele eaue un Trunc de jor ,
Dont eles orent grant paor
Cele qui près dou Trunc esteit
Quant vit ke ne se removeit,
Ses cunpaignes a apelées
Si sunt ensanble au Trunc alées ;
Puis le saluent come Rei
E chascune li promet fei .
Tutes le tienent pur Sengnour ,
Si li portent mult grant honour.
E quant li Truns ne se remut,
Celes virent bien que il s’estut
Emmi cele eawe tut en pès ,
Sor lui muntèrent à un fès ;
Lur vilanie sor lui firent,
El funs de l’iaue l’embatirent.
A la Destinée revunt
Roi demandent kar point n’en unt,
Malvaiz fu cil que lor duna ;
Car Destinée i envoia
Une Culuevre grant è fort,
Qui les deveure et trait à mort.
Tutes furent en grant turment,
Lors crièrent plus eigrement
A la Destinée merci ,
Quel lur ostast cel anemi.
La Destinée respundit
Nenil, nenil, je vus sufri
Trestutes voz vulentez fère ,
Seignur éustes débonère
Vileinement le hunésistes,
Or l’aiez tel cum le quésistes.
Moralité :
Ensi avient plu sur le funt
Des buns Segnurs quant il les tint ;
Tuz-jurs les woelent défoler,
Ne lor sevent honur garder.
Kar s’il nès tienent en destreit
Pur eaus ne ferunt tort ne dreit ;
A tel se prenent qui destruit,
Au daarain s’emplengnent tuit ,
Lors regretent lur bun Segnur,
Cui il firent la deshonur.
“D’un Estanc plain de Reines”
La Fontaine , liv. III, fab. IV. Les Grenouilles qui demandent un Roi.
