D’un hume voil ici mustrer
E par essample ramembrer;
De ses mains cunte et de ses piez
Et de sun chief qui ert iriez,
Envers sun ventre k’il purta
Por lur gaaing que il gasta
Qant il ne volst rien traveillier
Se li tolirent le mengier.
Mais kant li ventres géuna
Hastivement s’afébloia,
E mains è piez, qu’il ne pooient
Si traviller cum il suloient.
Qant le grant fobleté sentirent,
Mangier è boivre au ventre uffrirent.
Mais trop l’orent fet géuner
Si qu’il ne pooit riens guster ;
Li ventres revet au neent
E mains è piez tut ensement.
Moralité :
Cest essample puet-om véoir.
Chascuns franz-bums le doit savoir,
Nus ne puet mie aveir honour
Qui hunte fet à sengnour,
Ne li sires tut ensement
Pur qu’il voille honir sa gent
Se l’uns à l’altre en ert fallis
Andui en èrent mal-ballis
“D’un Homme qui ne voloit fere oevre”
Fables liées: Jean de La Fontaine : les Membres et l’Estomac.
