Qu’il nurrisseit un Chien petit ;
Suventes feis od li jua
E uns siens Asnes l’esgarda.
En sun curaige entendeit bien
Ke tuit li autre aiment le Kien
Pur le Segnur ki tant l’ameit,.
E avoec lui s’esbanoieit .
Souz son mantel le fist mucier
Sel’ fist les autres abaier ;
Dunc s’est li Asnes purpenseiz
Ke melx dou Chien vaut-il asseiz
E de biauté è de grandor;
Melx saureit-il à son Sengnor
Joer ke li Chienés petiz,
E melx sereit ois ses criz ;
Miex le saureit des piez férir
E miauz saureit sus li sailir .
Pur fol se tient k’à lui ne vet
E k’à sa voiz ne crie è bret
Cum feit li Chiens seur son Seignur.
Ensi avint ke par un jur
S’aleit li Sires déduisant,
E au petit Chiennet juant ;
Ne l’ pot li Asnes plus sufrir,
Vers sun Seingnur prist à venir,
Seur lui commance à rechaner
Ke tut le fet espoenter,
Des piez le fiert, suz lui sailli
Si k’à la terre l’abati,
Par un petit ne l’eu grevei
Se li Sires n’éust criei ,
Harou, harou , hé aidiez moi !
Si humme i saillent à desroi .
Chascun tient u mace u bastun,
L’Asne fièrent tuit envir un
A grant martire è à dolur ,
Polrent rescorre lor seignur.
Deci que l’Asnes unt tant batu
Que il l’unt laissié tuit estendu
A grant peine vint en sestable.
Moralité :
Saveir devuns par ceste fable
La ménière de meinte gent,
Mult le puet-on véoir suvent
K’il tant se voelent enhaucier
Et en tel liu appareillier
Ke n’afiert pas à lur curage,
En-seur-que-tut à lur parage
K’à mains en est si avenu
Cura à l’Asne qui fu batu.
“D’un riche Hume qui nurrisseit un Chiennet”
