Recueil général des fabliaux des XIIIe. et XIVe. siècle.
Publiés d’après les Manuscrits par M. ANATOLE DE MONTAIGLON. Tome I.
Diva! quar lai ester ta jangle :
Si te va seoir en cel angle,
Nos n’avons de ta jangle cure,
Quar il est raison et droiture
Par tôt le mont, que cil se taise
Qui ne sait dire riens qui plaise.
Tu ne sez vaillant II. festuz.
Com tu es ore bien vestuz
De ton gaaignaige d’oan !
Vois quiex sollers de cordoan,
Et com bones chauces de
Bruges! Certes, ce n’est mie de druges
Que tu es si chaitis et las.
Ge cuit bien, par S. Nicolas,
Que tu aies faim de forment.
Conment es tu si povrement ?
Que ne gaaignes tu deniers ?
Tu es ci un granz pautoniers :
Tu n’es pas mendre d’un frison.
Or déusses en garnison
Avoir .II. porpoinz endossez,
Ou à un cureur de fossez
Déusses porter une hote,
Tant que d’amone povre cote
Péusses iluec amender.
Mais tu aimes mielz truander,
Lechieres, que estre à hennor.
Or esgardez, por Dieu, seignor,
Cils homs, com richement se prueve !
Jamais, à nul jor, robe nueve
N’a u, pour chose que il die.
Or esgardez quel hiraudie
Il s’est iluec entorteilliez.
Moult est or bien apareilliez
De quant tel chaitis doit avoir.
Si t’aïst Diex, or me di voir :
Quiex homs es tu, or me di quiex.
Tu n’es mie menesterex
Ne de nule bone œuvre ovrieis ;
Tu sanbles un vilains bouvieis,
Ausi contrefez corne un bugles ;
Tu sanbles un meneur d’avugles
Miels que tu ne faces autre home.
Ge ne pris pas I. trox de pome
Ne toi ne tot quanques tu as.
Se Diex t’aïst, s’onques tu as
Onques nul home si te tue,
Que tu ne valz une letue,
Ne chose que tu saiches faire.
Pour Dé, si te devroies taire ;
Ne dois pas parler contre moi.
Que t’ai-ge dit ? or me di quoi ?
Tu ne sez à nul bien repondre ;
Pour ce si te devrait on tondre
Tantot autresi corne un sot.
Tu ne sez dire nul bon mot
Dont tu puisses en pris monter ;
Mais ge sai aussi bien conter,
Et en roumanz et en latin,
Aussi au soir corne au matin,
Devant contes et devant dus,
Et si resai bien faire plus
Quant ge sui à cort et à feste,
Car ge sai de chançon de geste.
Cantères sui qu’el mont n’a tel :
Ge sai de Guillaume au tinel,
Si com il arriva as nés,
Et de Renoart au cort nés
Sai-ge bien chanter com ge vueil,
Et si sai d’Aïe de Nantueil
Si com ele fu en prison ;
Si sai de Garins d’Avignon,
Qui moult estore bon romans;
Si sai de Guion d’Aleschans
Et de Vivien de Bourgogne ;
Si sai de Bernart de Saisoigne
Et de Guiteclin de Brebant ;
Si sai d’Ogier de Montaubant,
Si com il conquist Ardennois;
Si sai de Renaut le Danois;
Mais de chanter n’ai ge or cure.
Ge sai des romanz d’aventure,
De cels de la réonde Table,
Qui sont à oïr delitable.
De Gauvain sai le mal parler,
Et de Quex le bon chevalier;
Si sai de Perceval de Blois;
De Pertenoble le Galois
Sai ge’plus de .XL. laisses;
Mais tu, chaitif, morir te laisses
De mauvaitié et de paresce;
En tôt le monde n’a proesce
De quoi tu te puisses vanter;
Mais ge sai aussi bien conter
De Blancheflor comme de
Floire Si sai encor moult bon estoire,
Chançon moult bone et anciene;
Ge sai de Tibaut de Viane;
Si sai de Girart d’Aspremont.
Il n’est chançon en tot le mont
Que ge ne saiche par nature ;
Grant despit ai com tel ordure
Com tu es, contre moi parole.
Sez tu nule riens de citole,
Ne de viele ne de gigue?
Tu ne sez vaillant une figue.
De toi n’est il nus recouvriers;
Mais ge sui moult très bons ovriers,
Dont ge me puis bien recouvrer;
Se de ma main voloie ovrer,
Ansi com ge voi mainte gent,
Ge conquerroie assez argent;
Mais à nus tens ge ne fas œuvre.
Ge suis cil qui les maisons cueuvre
D’ués friz, de torteax en paele ;
Il n’a home jusqu’à Neele
Qui mielz les cuevre que ge faz.
Ge sui bons seignerres de chaz,
Et bons ventousierres de bués ;
Si sui bons relierres d’ués,
Li mieldres qu’en el monde saiches.
Si sai bien faire frains à vaches
Et ganz à chiens, coifes à chièvres.
Si sai faire haubers à lièvres,
Si forz qu’il n’ont garde de chiens.
Il n’a el monde, el siècle, riens
Que ge ne saiche faire à point :
Ge sai faire broches à oint
Mielz que nus hom qui soit sor piez;
Si faz bien forreax à trepiez
Et bones gaines à sarpes,
Et se ge avoie .II. harpes,
Ge nel lairai que ne vos die,
Ge feroie une meloudie
Ainz ne fu oie si grantz.
Et tu, diva, di, fax noienz,
Tu ne sai pas vaillant un pois.
Ge connoi force bons borgois
Et toz les bons sirjanz du monde;
Ge connois Gautier Trenchefonde,
Si connois Guillaume Grosgroing,
Qui assomma le, buef au poing,
Et Trenchefer, et Rungefoie,
Qui ne doute home qu’il voie ;
Mache-Buignet et Guinement.
Et tu, connois tu nule gent
Qui onques te faïssent bien ?
Nenil, voir, tu ne connois rien
Qui riens vaille en nulle saison.
Or me di donc pour quel raison
Tu te venis ici enbatre.
Près va que ne te faz tant batre
D’un tinel ou d’un baston gros,
Tant que tu fusses ausi mox
Com une coille de mouton.
Ains mais, por la croiz d’un bouton,
N’oï parler de tel fouet.
Vez quel vuidéor de brouet,
Et quel humerre de henas !
A bien poi se tient que tu n’as
Du mien, se ne fust pas pechié ;
Mais il ne m’ert jà reprouchié
Que tel chetif fiere ne bate,
Quar trop petit d’ennor achate
Qui sur tel chetif met sa main;
Mais se tu venoies demain
Entre nos qui somes de geste,
Tu te plaindroies de la feste.
Or t’en va, beax amis, va t’en :
Esté avons en autre anten.
Fu de ci, si feras que saiges,
Ou tu auras parmi les naiges
D’une grosse aguille d’acier;
Nos ne t’en volons pas chacier
Vilenement par nostre honte :
Nos savons bien que henor monte.
La response de l’un des II Kibauz.
Tu m’as bien dit tot ton voloir :
Or te ferai apercevoir
Que ge sai plus de toi assez,
Et si fu mieldres menestrez
De toi; moult me vois merveillant,
Nel dirai pas en conseillant,
Ainz vueil moult bien que chacun l’oie,
Se Diex me doint henor et joie,
De tex menesterex bordons
A qui en done moult beaux dons
A haute Cort menuement;
Qui bien sor dit et qui bien ment,
Cil est sires des chevaliers;
Plus donnent ils as mal parliers.
As cointereax, as mentéors,
Qu’ils ne font as bons trovéors
Qui contruevent ce que il dient
Et qui de nului ne mesdient.
Assez voi souvent maint ribaut
Qui de parler se font si baut
Que ge en ai au cueur grant ire.
Et tu, bordons, que ses tu dire,
Qui por menesterel te contes ?
Ses tu ne beax diz ne beax contes
Pourquoi tu doies riens conquerre ?
De quoi sers tu aval la terre ?
Ce me devroies tu retraire.
Ge te dirai que ge sai faire :
Ge sui jougleres de vièle ;
Si sai de muse et de frestèle
Et de harpe et de chifonie,
De la gigue, de l’armonie ;
Et el salteire et en la rote
Sai-je bien chanter une note ;
Bien sai joer de l’escanbot
Et faire venir l’escharbot
Vif et saillant dessus la table,
Et si sai meint beau geu de table
Et d’entregiet et d’arrumaire
Bien sai un enchantement faire;
Ge sai moult plus que l’en ne cuide,
Quant g’i vueil mestre mon estuide,
Et lire et chanter de clergie,
Et parler de chevalerie,
Et les prudhomes raviser,
Et lor armes bien deviser.
Ge connois Monseignor Hunaut
Et Monseignor Rogier Ertaut,
Qui porte un escu à quartiers;
Tosjors est-il sains et entiers,
Quar onques n’i ot cop feru.
Ge connois Monseignor Bégu,
Qui porte un escu à breteles
Et sa lance de .II. ateles
Au tournoiement, à la haie;
C’est li hons du mont qui mielz pa
Menesterex à haute feste.
Si connois Renaut Brise-teste,
Qui porte un chat en son escu ;
Cil a u maint tornoi vaincu;
Et Monseignor Giefroi du Maine,
Qui tosjors pleure au diemaine ;
Et Monseignor Gibout Cabot,
Et Monseignor Augis Rabot,
Et Monseignor Augier Poupée,
Qui à un seul coup de s’espée
Coupe bien à un chat l’oreille.
A tozvos sembleroit merveille
Se ceus voloie raconter ,
Que ge conois dusqu’à la mer.
Ge sai plus de toi quatre tanz :
Ge connoi toz les bons serjanz,
Les bons chanpions affaitiez;
Si en doi estre plus proisiez.
Ge connois Hébert Tue-Buef,
Qui à un seul coup brise un huef ;
Arrache-Cuer et Runge-Foie,
Qui ne doute home que il voie,
Et Heroart et Dent de Fer,
Et Hurtaut et Tierry d’Enfer,
Abat-Paroi, fort pautonier,
Et Jocelin Torne-Mortier,
Et Ysenbart le Mauréglé,
Et Espaulart, le fils Raiché,
Et Quauquelin Abat-Paroi,
Et Brise-Barre et Godefroi,
Et Osoart et Tranche-Funde,
Et tos les bons sirjans du monde,
Et deçà et delà la mer
Vous sauroie bien aconter.
Ge sai tan et si sui itex
Ge connois toz les menestrex,
Cil qui sont plus amé à cort
Dont li granz renons partot cort.
Ge connois Hunbaut Tranchecoste
Et Tiecelin, et Porte-Hotte,
Et Torne-Enfine et Brisevoire,
Et Bornicant, ce est la voire,
Et Fierabras et Tuterel,
Et Maie Branche et Mal-Quarrel,
Songe-Feste à la grant vièle,
Et Grimoart qui chalemèle ;
Tirant, Traiant et Enbatant
Des menestrex connois itant.
Qui me vorroit mestre à essai,
Que plus de mil nomer en sai.
Ge sai bien servir un prudome,
Et de beax diz toute la some ;
Ge sai contes, ge sai flabeax;
-Ge sai conter beax diz noveax,
Rotruenges viez et noveles,
Et sirventois et pastoreles.
Ge sai le flabel du Denier,
Et du Fouteor à loier,
Et de Gobert et de dame Erme,
Qui ainz des els ne plora lerme,
Et si sai de la Coille noire;
Si sai de Parceval l’estoire,
Et si sai du Provoire taint
Qui o les crucefiz fu painz;
Du Prestre qui menja les meures
Quant il devoit dire ses heures;
Si sai Richalt, si sai Renart,
Et si sai tant d’enging et d’art.
Ge sai joer des baasteax
Et si sai joer des costeax,
Et de la corde et de la fonde,
Et de toz les beax giex du monde.
Ge sai bien chanter à devise
Du roi Pépin de S. Denise;
Des Loherans tote l’estoire
Sai-ge par sens et par mémoire ;
De Charlemaine et de Roulant
Et d’Olivier le conbatant.
Ge sai d’Ogier, ge sai d’Aimmoin
Et de Girart de Roxillon,
Et si sai du roi Loeis,
Et de Buevon de Conmarchis
De Foucon et de Renoart,
De Guielin et de Girart,
Et d’Orson de Beauvez la some;
Si sai de Florance de Rome,
De Ferragu à la grant teste ;
De totes les chançons de geste
Que tu sauroies aconter
Sai ge par cuer dire et conter;
Ge sai bien la trompe bailler,
Si sai la chape au cul tailler,
Si sai porter consels d’amors
Et faire chapelez de flors
Et çainture de druerie
Et beau parler de cortoisie
A ceus qui d’amors sont espris,
Et tu donc cuides avoir pris !
Ne parle mais là ou ge soie,
Mais fui de ci et va ta voie.
Va aprendre, si feras bien,
Qui, contre moi, ne sez tu rien.
Beax seignor, vos qui estes ci,
Qui nos parole avez oï,
Se j’ai auques mielz dit de li,
A toz ge vos requier et pri
Que le metez fors de céanz,
Qui bien pert que c’est .I. noienz.
Explicit des .II. Troveors.
