De Mur-e et Rana
Muris iter rumpente lacu, venit obvia muri
Rana loquax et opem pacta nocere cupit.
Omne genus pestis superat mens dissona verbis,
Cum sentes animi florida lingua polit.
Rana sibi murem filo confederat; audet
Nectere fune pedem, rumpere fraude fidem.
Pes coit ergo pedi, sed mens a mente recedit.
Ecce natant: trahitur ille, sed illa trahit.
Mergitur ut secum murem demergat; amico
Naufragium faciens naufragat ipsa fides.
Rana studet mergi, sed mus emergit et obstat
Naufragio: vires suggerit ipse timor.
Milvus adest miserumque truci rapit ungue duellum.
Hic iacet, ambo iacent, viscera trita fluunt.
Sic pereant qui se prodesse fatentur et obsunt;
Discat in auctorem pena redire suum.
“De Mur-e et Rana”