Dou Vilains cui li Escarboz entra en cors ;
alias
Dou Vileins qui se dormeit contre le Soloil adenz
D’un Vilain dist qui se giseit,
Cuntre le Solueill se dormeit,
Adenz s’est mis tuz descuvers
E ses pertuiz fust tot uvers ;
Uns Escharboz dedens entra,
E li Villains s’en esvella.
Grant mal li fist, tant q’à un Mire
L’estut aler cunter è dire ;
Li Mires dist qu’il esteit preins ,
Lors li fu pis qu’il n’esteit eins ,
Car li Vileins bien le créoit
E tous li Pueples qui l’ooit,
Dient que c’est sénéfiance.
En paor sunt et en dutance
N’i a celui ki bien nel’ croie
Ke grans max à venir en doie;
Tant ert li folx Pules muaules
En veines choses nun-estaules
Unt lur créance et lur saveir.
Li Vilain gaîtent pur saveir
Par où cil enfez deveit nestre ;
Li Escarboz par la fenestre
U il entra s’en est issus
Ez-les-vous lors tus décéus.
Moralité :
Par cest essample que vus di
Des nun-sachanz est autresi,
Qui croient à ce qu’estre ne puet,
Vanitez les trait è muet.
“Dou Vilains cui li Escarboz entra en cors”