C’est principalement par l’assiduité que nous venons à bout des choses les plus difficiles.
Le Lievre se mocquoit de la Tortue, & luy disoit qu’elle estoit une vilaine beste, pesante, & sans esprit. La Tortue se voyant si mal-traitée de paroles, luy dit que sa pesanteur ne l’empescheroit pas de courir contre luy, & qu’elle avoit assez d’esprit pour se conduire en sorte qu’elle sçauroit bien emporter la victoire. Le Lievre accepta le défi, & après avoir convenu d’un lieu assez éloigné jusques auquel il falloit courir, la Tortue se mit tout doucement en chemin. Le Lievre qui se mocquoit d’elle, & qui se confioit à sa disposition, se prit à dormir, s’imaginant qu’il atteindroit la Tortue quand il luy plairoit : mais après avoir dormy trop long-temps, & s’estre éveillé, se ressouvenant de sa gageure, il se mit à courir, & arrivant au lieu de l’assignation, il y trouva la Tortue, qui se mocqua de luy, & emporta la victoire.
“Du Lievre et de la Tortue”
