Le Paysan et le Chien

Eustache DESCHAMPS

Uns païsans ot un mastin
Josne, qui le servit long-temps ;
Aux loups faisoit moult de hutin,
Et gardoit ses brebis aux champs;
Venoisons prenoit et cerfs grans ,
Et si gardoit l’ostel par nuit.
Lors l’ama moult li païsans :
On est amé tant c’om fait fruit.

Mais viellesce vint en la fin
A ce chien, si devint pesans,
Car fait avoit maint dur chemin ;
Lors fut à son maistre chargans ,
Batre le fait à ses sergens,
Et dit que cilz vieulz chien lui nuit;
Les juenes fut adonc prenans ;
On est amé tant c’om fait fruit.

Lors dist Rouvel en son latin :
J’ay esté tout mon corps usans
A vous paistre de maint lopin,
Garder l’ostel, femmes et enfans;
Ce me deust estre secourans ;
Mais remunération fuit;
Soiez tuit à ce regardans :
On est amez tant c’om fait fruit.

Envoi

Princes, mains sont aux cours servens
De piéçà qui viellesce cuit;
Les nouveaulx boutent hors telz gens :
On est amé tant c’om fait fruit.

“Le Paysan et le Chien”

Voir la fable d’Esope “D’un vieux Chien et de son Maître“